२०७९ श्रावण २६
  • काठमाडौँ

करिब साढे ३ बर्ष सम्म प्रदेशको नाम राख्न नसकेका मुख्यमन्त्री शेरधन राईले राजीनामा दिँदै, भीम आचार्यलाई मुख्यमन्त्री बनाउने तयारी

विराटनगर । नेकपा एमाले विभाजनको असर प्रदेश–१ मा पनि देखिन थालेको छ । माधवकुमार नेपाल समूहले नेकपा (एकीकृत समाजवादी) दल दर्ता गरेसँगै प्रदेश–१ मा असर देखिएको हो ।

लामो समयदेखि माधव नेपाललाई साथ दिँदै आएका एमालेका दोस्रो तहका १० नेता एमालेमै बसेपछि प्रदेश–१ को सरकार पनि फेरिने भएको छ ।

मुख्यमन्त्री शेरधन राईले करिब साढे तीन वर्ष लामो सत्ता यात्रा टुंगाउन लागेका हुन् । राईले आफ्नो सत्ता यात्रालाई टुंग्याउन आज (बिहीबार)
एमाले प्रदेश–१ संसदीय दलको बैठक बोलाउनु भएको छ ।

बिहीवार नेकपा एमालेको केन्द्रीय कमिटी बैठक बस्नुअघि नै प्रदेशमा संसदीय दलको बैठक बसेर दल नेता परिवर्तन गर्ने योजना एमालेमा छ ।

बिहीबार संसदीय दलको बैठकका लागि ठीक पर्नु भन्ने जानकारी प्रदेशका एमालेका सांसदलाई नेतृत्वले दिइसकेको छ ।

मुख्यमन्त्री राईले राजीनामा दिएलगत्तै दलको बैठकले औपचारिक रुपमा दलको नेता भीम आचार्यलाई बनाउने र आज नै मुख्यमन्त्रीमा नियुक्तिका लागि प्रदेशप्रमुख समक्ष सिफारिस गर्ने तयारी गरेको एमालेका एक सांसदको भनाइ छ ।

काठमाडौंमा केन्द्रीय कमिटी बैठक समेत रहेकाले त्यस अगाडि पार्टीको द्वन्द्व सकिएको सन्देश दिन बिहीबार नै मुख्यमन्त्रीमा भीम आचार्य आउन सक्ने चर्चा छ ।

आचार्यलाई मुख्यमन्त्री बनाएर सत्ता हस्तान्तरण गर्नेबारेमा राई अहिले काठमाडौंमा एमाले शीर्ष नेतृत्वसँग छलफलमा हुनुहुन्छ ।

केन्द्रीय कमिटीको बैठकमा भाग लिन आउनु भएका मुख्यमन्त्री राई बिहीबार बिहानै बिराटनगर जानुहुने कार्यक्रम छ ।

राई एमाले अध्यक्ष केपी शर्मा ओलीनिकट हुनुहुन्छ भने आचार्य वरिष्ठ नेता झलनाथ खनालनिकट हुनुहुन्छ ।
खनाल दिल्ली जानु अघिसम्म उहाँ नेपाल–खनाल समूहमै हुनुहुन्थ्यो । तर पछिल्लो समय नेपालले पार्टी फुटाउने कुरामा असहमति राख्दै आचार्य एमालेमै बस्नुभएको छ ।

प्रदेश–१ मा एमालेका ५१ सांसद छन् । जसमा १३ सांसद आफ्नो पक्षमा भएकाे नेपाल नेतृत्वको नेकपा समाजवादीले दावी गर्दै आएको छ ।

 अहिलेसम्म ४ जना नेपालको नेकपा समाजवादीमा खुलिसकेका छन् । प्रदेश सांसदहरु राजन राई, राजेन्द्र राई र गणेश काङमाङ नेपालको नयाँ पार्टीका केन्द्रीय सदस्य भइसकेका छन् । प्रदेश १ मा हाल ९२ जना सांसद छन्। सरकार बनाउन ४७ जना सांसद आवश्यक पर्दछ ।

साभार- न्युज 24

२०७८ भाद्र १०, बिहीबार ०६:५३ 1 Minute 220 Views

यहाँ प्रकाशित कुनै समाचारमा तपाईंको गुनासो भए हामीलाई इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ । हामीसँग तपाईं फेसबुकट्विटरमा पनि जोडिन सक्नुहुन्छ ।